मिरुनालाई पाउन संघर्ष गर्दै दया, बस्लान् त ‘घरज्वाईं’ ?

इटहरी/ मगर समुदायको संस्कारलाई मुल बिषय बनाएर निर्माण गरिएको फिल्म ‘घरज्वाईं’ को टिजर सार्वजनिक गरिएको छ । अभिनेता दयाहंग राई र अभिनेत्री मिरुना मगर प्रमुख भूमिकामा रहेको फिल्मको सार्वजनिक टिजरमा दयाहाङले मिरुनालाई पाउन गरेको संघर्षलाई देखाईएको छ । टिजरका अनुसार दयालाई मास्टरको भूमिकामा यो फिल्ममा देख्न पाईने छ । जिएम मुभीज र एबीएम सिनेमा प्रोडक्सनको ब्यानरमा निर्माण भएको फिल्मलाई जनक घर्ति मगरले निर्माण गरेका हुन् ।

यो फिल्म ‘घरज्वाईं’ लाई अनिल बुढा मगरको निर्देशन गरेका हुन् । पूर्वी रुकुम आसपासमा छायांकन गरिएको यो फिल्मको यतिबेला पोस्ट प्रोडक्सनको कार्य भैरहेको छ भने फिल्म आगामी आसारको २८ गतेबाट सार्वजनिक प्रदर्शनमा आउनेछ । निर्माण युनिटले फिल्मको प्रचारप्रसार अनुरुप एकपछि अर्को कन्टेन्टहरु सार्वजनिक गरिरहेको छ। फिल्मको केहि अघि २ पोस्टर सार्वजनिक गरिएको थियो । हेर्नुस टिजर

‘घरज्वाईं’ को कथा लेखन पनि निर्देशक अनिलकै रहेको छ भने उनलाई पटकथा तथा संवाद लेखनमा भने विनोद खतिवडा र सुभाष कोइरालाले सघाएका छन् । यो फिल्ममा दयाहाङ र मिरुनाका अलवा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरको अभिनय रहेको छ ।