अस्कर कलेजले इटहरीमा गर्यो ‘सिनेमा साक्षारता अभियान’

इटहरी/ स्थानिय स्तरमा पनि नेपाली फिल्मको बारेमा युवापुस्तालाई ज्ञान प्राप्त होस् र यसबारे चासो अनि सकारात्मक सोचको विकास होस् भन्ने उद्देश्य सहित अस्कर इन्टरनेसनल कलेजले देशैभर ‘सिनेमा साक्षारता अभियान’ गरिरहेको छ । जसअन्तर्गत अस्करले शुक्रवार इटहरीमा यो कार्यक्रम सम्पन्न गरेको छ । कोशी प्रदेशबाट यो अभियान सुरु गरेको अस्करले सुरुमा बिर्तामोड र बिराटनगर पछि शुक्रवार इटहरीमा अवस्थित सुष्मा गोदावरी कलेजको सभाहलमा यो कार्यक्रम गरेको हो ।

इटहरीका ५० बढी युवामाझ गरेको यो १ दिने कार्यक्रममा फिल्मको इतिहास, फिल्मसंग सम्बन्धित प्रश्नोत्तर, स्कृप्ट लेखन, चरित्र निर्माण, अभिनय ज्ञान लगायतका विषयमा जानकारी गराईएको थियो । उपस्थित सहभागीहरुलाई यस बिषयमा अभ्यास पनि गराईएको थियो । दिनको १२ बजेदेखि सुरुभएको कार्यक्रम झन्डै ४ घण्टासम्म चलेको थियो । उत्सुकताका साथ उपस्थित युवापुस्ताहरुलाई अन्त्यमा २ सर्ट फिल्म देखाउदै कार्यक्रम सम्पन्न गरिएको थियो ।
एउटा सामान्य घटनालाई कसरी परिकल्पना गर्दै त्यसलाई कथामा उतारेर स्कृप्ट लेख्ने, डाईलोग र चरित्र निर्माण गर्ने भन्ने कुराहरू यो कार्यक्रमबाट सिकेको उपस्थित युवाहरुको भनाई छ । काठमाडौमा स्थापना भएर सिनेमा शिक्षा दिइरहेको अस्कर इन्टरनेसनल कलेज नेपालकै पहिलो फिल्म पढाउने कलेज हो । यो कलेजको टिम यतिबेला कोशी प्रदेशको अभियानलाई सम्पन्न गरेर पश्चिम लागेको छ । अब जनकपुर, हेटौंडा, चितवन, बुटवल, दाङ र धनगढीहुँदै पोखरामा यो कार्यक्रमको बिट मारिने कलेजका प्राध्यापक रामराजा दाहालले जानकारी गराए । अस्करले विगत २ दशकदेखी सिनेमा शिक्षा दिदैँ आईरहेको छ भने त्रिभुवन विश्वविद्यालयबाट सम्बन्धनप्राप्त कलेज हो ।