‘गाउँ आएको बाटो’ बेइजिङ इन्टरनेशनल फिल्म फेस्टिवल’मा छनोट

इटहरी / नवीन सुब्बाले निर्देशन गरेको फिल्म ‘गाउँ आएको बाटो’ चीनको १२ औं बेइजिङ इन्टरनेशनल फिल्म फेस्टिवल’मा छनोट भएको छ।

केही समयअघि ‘टोरोन्टो इन्टरनेश्नल फिल्म फेस्टिभल’ बाट विश्व प्रिमियर गरिएको यो फिल्म स्वीडेनमा भएको ४७औ ‘गोटेबर्ग अन्तर्राष्ट्रिय फिल्म महोत्सव–२०२४’ पनि छनोट भएको थियो । फिल्मको ‘वुसान अन्तर्राष्ट्रिय फिल्म फेस्टिभल’ मा र मुम्बईको मामीमा साउथ एशियन प्रिमियर भइसकेको छ।

फिल्मले राई जातिको सामाजिक पृष्ठभूमिमा गाउँमा सडक पुगेपछि बाबुछोराको सम्बन्धमा आउने उतारचढावलाई देखाएको छ। सामुदायिक लगानीको अवधारणामा निर्माण भएको फिल्ममा देशभित्र र विश्वका विभिन्न देशहरूमा छरिएर रहेका नेपालीहरूको सामुहिक लगानी छ।

दयाहाङ राई, पशुपति राई, प्रसन राई, केशव राई, सुमित्रा राई, राज थापा र प्रेम सुब्बालगायतका कलाकारको अभिनय भएको यो फिल्म आगामी जेठ १८ गते नेपालमा रिलिज हुँदैछ । छोमोलोङमा प्रोडक्सन र गाउँघर फिल्म प्रोडक्सनको सहयोगमा मेन्छ्याम पिक्चर्सको ब्यानरमा निर्माण नेपालमा बाँसुरी फिल्म्सले रिलिजको संयोजन गरेको छ।