इटहरी / चैत ३० मा रिलिज हुने चलचित्र ‘डिग्री माइला’को ट्रेलर यतिबेला युटुब नेपाल फिल्म सेक्शनको ट्रेन्डिङ १ मा आएको छ नयाँ वर्ष २०८१ सालको कोशेली स्वरुप रिलिजको तयारीमा रहेको रामबाबु गुरुङ निर्देशित फिल्म ‘डिग्री माइला : एमए थर्ड क्लास’को ट्रेलर सार्वजनिक भएसंगै अहिले ट्रेलर एघार लाख त्रिसट्ठी हजार भन्दा बढीले हेरिसकेका छन् । सार्वजनिक ट्रेलरले वर्षको अन्तिममा रिलिज हुन लागेको यो सिनेमाले नेपाली सिनेउद्योगलाई सुखद् समापन दिने संकेत गरेको छ । हेर्नुहोस् ट्रेलर:
चार मिनेट लामो ट्रेलरले यो फिल्म शैक्षिक बेरोजगारीको कथावस्तुमा बनेको छ भन्ने बुझाउछ र कथाले आदर्शवादी लाग्ने ‘डिग्री माइला’नामक चरित्रलाई पछ्याउँछ । थर्ड डिजिभनमा एमए पास गरेका दयाहाङलाई गाउँकै कलेजबाट प्रध्यापनका लागि प्रस्ताव आउँदा आफूलाई तलब खुवाउने हैसियत कलेज सञ्चालकसँग नभएको भन्दै उनले त्यहाँ जागिर खाँदैनन् । जसका कारण उनलाई अपहरण गर्नुपर्ने हुन्छ । अन्यथा क्याम्पसको सम्बन्धन नै खारेज हुने अवस्थामा पुगेको ट्रेलरमा उल्लेख छ । दयाहाङ राईले निभाएको चरित्रमार्फत निर्देशकले मुलुकको शैक्षिक राजनीतिक, सामाजिक र युवापुस्ताको अवस्थालाई चित्रण गर्ने प्रयास गरेका छन् ।
यसअघि अभिनेता दयाहाङ राईको निर्देशनमा ‘डिग्री माइला’लाई नाटकका रूपमा मण्डला थिएटरमा मञ्चन गरिएको थियो । त्यसमा केही परिवर्तन गरेर चलचित्रका रूपमा पनि ल्याइएको अभिनेता दयाहाङले जनाएका छन् सिनेमालाई बाँसुरी फिल्मसले कबड्डी फिल्मस तथा सुस्मा फिल्मससँग मिलेर निर्माण गरेको यो चलचित्रमा दयाहाङ राई, आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय छ । यसमा अभिनेत्री ऋचा शर्मा अतिथि भूमिकामा छिन्।
निमेष श्रेष्ठको सम्पादन तथा रोहित शाक्यको ब्याकग्राउन्ड म्युजिक रहेको सिनेमालाई क्यामेरा म्यान शिवराम श्रेष्ठले खिचेका हुन् । नेपाली उखान ‘किन चाउरिस मरिच आफ्नै रागले’मा यो चलचित्रको कथा आधारित रहेको निर्देशक रामबाबुले बताए ।
Discussion about this post