इटहरी/ यहि चैत्र ९ गतेबाट नेपालसहित विश्वभर प्रदर्शनमा आउने चलचित्र महाजात्रा टिमले विहिबार कमेडी विथ च्याम्पियनको आयोजनामा ‘महाकमेडी विथ महाजात्रा’ अन्तर्गत इटहरीमा कार्यक्रम सम्पन्न गरेको छ । फिल्मको प्रोमोसनल कार्यक्रम देखिए पनि ‘महाकमेडी विथ महाजात्रा’ कार्यक्रममा महाजात्रा युनिट अतिथिको रुपमा उपस्थित रहेको फिल्मका कलाकार तथा कार्यकारी निर्माता रबिन्द्र सिंह बानियाँले जानकारी गराए । तर, प्रोमोसनल कार्यक्रममा ५०० रुपैयाँ टिकट लिएको भन्दै सामाजिक संजालमा केहिले कमेन्ट तथा स्ट्याटस नै लेखेर असन्तुष्ट व्यक्त गरेका थिए । बानियाँका अनुसार उक्त टिकट शुल्क आफुहरुले नलिएको हुनाले भ्रममा नपर्न आग्रह गरे ।
यस्तै महाजात्रा टिमले इटहरीमा पत्रकार भेटघाट पनि गरेको थियो । ‘महाकमेडी विथ महाजात्रा’ कार्यक्रम भन्दा अगाडि आयोजना भएको पत्रकार भेटघाट कार्यक्रममा फिल्मका तर्फबाट कलाकार राजाराम पौडेल, रबिन्द्र झा र कार्यकारी निर्माता तथा कलाकार रबिन्द्र सिंह बानियाँ उपस्थित थिए । बानियाँ भन्छन् ‘सबैलाई सबै फिल्म मनपर्दैन तर जात्राको सिक्वेलहरु दर्शकहरुले अहिलेसम्म मनपराएर माया गरेर नै हामीले महाजात्रा निर्माण गरेका हौ । चलचित्र बनाउनमा आफुहरुले कुनै कन्जुस्याइँ गरेका छैनौ र दर्शकहरुले यसभन्दा अघिका शृङ्खलाहरु ‘जात्रा’ र ‘जात्रै जात्रा’लाई जस्तै ‘महाजात्रा’ लाई पनि झन् धेरै रुचाउनुहुने कुरामा हामी विश्वस्त छौ ।’
‘महाजात्रा’ प्रदर्शन हुन मात्र १ हप्ता बाँकि छ । यो फिल्मको कोशी प्रदेशमा पनि प्रिमियर गर्ने तयारी रहेको बानियाँले जानकारी गराए । उनका अनुसार चैत ७ गते बिर्तामोडमा प्रिमियर शो आयोजना गर्ने तयारी भएको छ । यसअघि यहि टिमले निर्माण गरेको फिल्म ‘महापुरुष’ को इटहरीमा प्रिमियर गरिएको थियो । महायात्राको दोश्रो चरण अन्तर्गत ‘महाकमेडी विथ महाजात्रा’ टुर विर्तामोडबाट सुरु भएको थियो । फागुन ३० गते विर्तामोडमा कार्यक्रम र पत्रकार भेटघाट गरेको थियो । कमेडि च्याम्पियनबाट उदाएका सुमन कार्की, सजन श्रेष्ठ, कैलाश कार्की, सुशान्त बस्याल, प्रभात लामा, पवन भट्टराई, सन्तोष थापा लगायत कमेडियनहरुको प्रस्तुति रहेको थियो । यता महाजात्रा टिमको तर्फबाट भने प्रमुख कलाकार राजाराम पौडेल, विपिन कार्की, रबिन्द्र झा र कार्यकारी निर्माता तथा कलाकार रबिन्द्र सिंह बानियाँको आतिथ्यता रहेको थियो ।
फिल्म ‘महाजात्रा’ प्रमोसनल टुर अन्तर्गत कोशी प्रदेश आएको मौकामा अनेरास्ववियू सुनसरीको आयोजनामा ‘क्याम्पस थियटर सिजन १’ अन्तर्गत रोशन आचार्यको निर्देशन र कलालय इटहरीको नाट्य प्रशिक्षण रहेको ‘बहुला काजीको सपना’ नाटकको टिमहरुसंग पनि भेटघाट भएको थियोे । ‘महाजात्रा’ टिमलाई भव्य स्वागत गर्दै ‘जनता क्याम्पस’का विद्यार्थीहरुले मौलिक अभिनयसहितको नाटक देखाएका थिए । पूरा नाटक हेर्ने समय नभएपनि थोरै समय हेरेर उनीहरुसँग केहीबेर अन्तरक्रिया पनि गरेका थिए । यस्तै ड्रीम मोडलिङ एजेन्सीको आयोजनामा हुने ‘जुनियर मिस्टर एन्ड मिस इटहरी’ का साना-साना भाईबहिनिहरुसंग पनि इटहरीमा भेटघाट गरेको थियो । उनिहरुले विपिन कार्की, राजाराम पौडेल र रबिन्द्र सिंह बानियाँसंग अटोग्राफ लिएका थिए ।
धरानमा महाजात्रा टिमसंग ‘सिनेमा संवाद’ कार्यक्रम पनि प्रोमोसन अन्तर्गत गरियो भने फिल्मको प्रचारप्रसार गर्दै यहाँका विभिन्न मेला महोत्सवहरुमा समेत फिल्मका कलाकारहरु पुगेका थिए । फिल्म युनिटले बिराटनगरमा पत्रकार भेटघाट गरेको थियो । प्रदिप भट्टराईको निर्देशन तथा ‘षट्कोण आर्ट्स’को ब्यानरमा निर्माण भएको फिल्ममा बानियाँसंगै रबिन्द्र झा, बिपिन कार्कि, वर्षा राउत, राजाराम पौडेल, हरिवंश आचार्य, सुमन कार्की लगायतका कलाकारहरुको अभिनय रहेको छ ।
Discussion about this post