इटहरी/ चलचित्र‘दिमाग खराब’पश्चात् निर्माता तथा अभिनेता निश्चल बस्नेत सहितको टोली‘बेहुली फ्रम मेघौली’ चलचित्रको छायांकनमा लागिसकेका छन् । बुधबार बिहान चितवनको एक मन्दिरमा मुहूर्त गर्दै चलचित्रको छायांकन सुरु गरिएको अभिनेता निश्चल बस्नेतले जानकारी दिए । कमेडी-सोसल ड्रामाको छायांकन भरतपुरको मेघौली आसपासमा ३५ दिनसम्म चल्ने उनलेे बताए ।
यस चलचित्रमा स्वस्तिमा खड्का र निश्चल बस्नेतको शीर्ष भूमिका रहने छ भने विजय बराल, सिम्रन खड्का, आमिर गौतमको पनि अभिनय रहने छ । साजन काफ्ले र आकाश बरालले निर्देशन गर्ने यो फिल्मबाट स्वस्तिमाले निर्मात्रीको रुपमा डेब्यु गर्दैछिन् भने फिल्मको कार्यकारी निर्मातामा शंकर पाण्डे र फिरोज खड्का छन् ।
शुभसाइत पूजा समारोहको तस्वीर हेर्दा स्वस्तिमालाई क्यारेक्टर लुक्समा देख्न सकिन्छ । उनी कुर्थामा सजिएकी छिन् । आउँदो दशैंमा डीसीएनले यो फिल्मलाई रिलिज गर्दैछ। निर्माता तथा अभिनेता निश्चल बस्नेतले यसपछि आफ्नै निर्देशनमा एक्सन फिल्म बनाउने बताएका छन् । २०८३ सालमा ‘दिमाग खराब’को दोस्रो श्रृंखला बनाउने उनको तयारी छ ।
Discussion about this post