मेयर हर्कको ‘खजुरे ब्रो’बाट फिल्ममा डेब्यु, अब धरानमा फिल्म सुटिङ गर्दा विशेष सपोर्ट गर्ने

इटहरी/ केहिसमय अघिदेखी मिस इन्टरनेसनल नेपाल नीति शाहले डेब्यु गर्ने फिल्म ‘खजुरे ब्रो’मा धरानका नगरप्रमुख हर्क साम्पाङले पनि विशेष भुमिकामा अभिनय गर्ने चर्चा चलिरहेको थियो । यसै कारणले पनि फिल्मको चर्चा बढेको थियो । मुडि स्वभावको मान्छे भएको हुँदा सायदै उनले अभिनय गर्दैनन् भनेर चर्चा चलिरहेको बिचमा हर्कले अभिनय गरेका छन् । यतिबेला धरान तथा इटहरीमा छायांकन भैरहेको फिल्मको शनिबार उनले धरानमा टेक दिएका छन् ।

अभिनेत्री नितिले उनीसंगको तस्वीर पनि सामाजिक संजालमा सार्वजनिक गरेकी छन् । फिल्ममा नगरप्रमुख साम्पाङ अतिथी भुमिकामा देखिने फिल्म निर्माण युनिटको भनाइ छ । साम्पाङको १ मिनेट लामो भुमिकामा उनी नगरप्रमुख नै भएर नै देखिने छन् । नगरप्रमुख साम्पाङले फिल्ममा डेब्यु गरेसंगै उत्साहित देखिएका उनले धरानमा छायांकन हुने फिल्मलाई सहयोग गर्ने मनसाय देखाएका छन् ।

आइतवार फेसबुकमा एक स्ट्याटस लेख्दै साम्पाङले यो भनेका हुन् । उनले ‘अब बन्ने नेपाली चलचित्रहरु सबै धरानमा बनुन् भन्ना खातिर कलाकारहरूलाई विशेष सपोर्ट गर्ने चाँजो मिलाईनेछ’ भनेर लेखेका छन् । अबको दिनमा उनको यो स्ट्याटस अनुसार नै हुने हो भने धरानमा फिल्म छायांकन बाक्लो हुनेछ भने धरानको पर्यटनमा सहयोग तथा यहाँको सौन्दर्यता फिल्मका माध्यमबाट सबैले देख्न पाउनेछन् । जे होस्, उनको यो स्ट्याटस, स्ट्याटसमै मात्रै सिमित नहोस् । यो कोशी प्रदेशमा रहेका चलचित्रकर्मीहरुको लागी समेत खुशी र उर्जाको कुरा हो ।

पारिवारिक व्यङ्ग्यात्मक जनारामा बन्ने ‘खजुरे ब्रो’ दिव्य दृश्य इन्टरटेन्टमेन्टको ब्यानरमा निर्माण भैरहेको छ। फिल्मलाई निर्देशक सुरज सुनुवारले निर्देशन गरिरहेका छन्। फिल्ममा रेयर राई, महेश त्रिपाठी, नीति शाह, नवीन मानन्धर, प्रकाश भुजेल, विनीता थापामगर, सुष्मा निरौला, पुष्कर कार्की, मनिष राउत, प्रेम सुब्बा र सुजाता राई लगायतको मुख्य भूमिकामा अभिनय रहने छ । आगामी वर्ष २०८१ को जेठ महिनालाई प्रदर्शन महिनाको रुपमा तय गरेको फिल्मको डायमन्ड उप्रेती कार्यकारी निर्माता हुन् । ‘खाजुरे ब्रो’लाई शिशिर बिसंखेले छायाङ्कन गरिरहेका छन् ।