फिल्म ‘मायाका रङ्गहरु’ मा अभिनेता पल शाह अनुबन्ध

इटहरी/ अभिनेता पल शाहको मुख्य अभिनय रहने गरि फिल्म ‘मायाका रङ्गहरु-कलर्स अफ लभ’ को निर्माण घोषणा गरिएको छ । जुन फिल्मका लागी अभिनेता पल शाह अनुबन्ध भैसकेका छन् । केवल तामाङले यो फिल्मबाट निर्देशनमा डेब्यु गर्ने भएका छन् भने फिल्मलाई उनैले निर्माण गर्नेछन् । इन्डो नेपाली फिल्मको रुपमा रहेको ‘मायाका रङ्गहरु’ लाई अभिनेता शाहले दिनेश राउतको फिल्म ‘पुजार सार्की’को छायांकन पछि समय दिने बताइएको छ ।

यो फिल्मको ९० प्रतिशत छायांकन सिक्कीममा हुनेछ । बाकी रहेको १० प्रतिशत छायांकन दार्जिलिङ, इलाम र काठमाडौमा गर्ने निर्माण युनिटले जानकारी गराएको छ । नेपाली र हिन्दी भाषामा निर्माण गरिने भएकोले यो फिल्मलाई इन्डो नेपाली फिल्मको रुपमा लिइएको छ ।

प्रमिस इन्टरटेनमेन्टको ब्यानरमा बन्ने यो फिल्म ‘मायाका रङ्गहरु’ लाई सौरभ लामाले छायांकन गर्नेछन् भने हेड अफ प्रोडक्सन तथा लाइन प्रोडुसरमा सिक्किमबाट टीकाराम अधिकारी, दार्जिलिङबाट सुवास छेत्री र नेपालबाट पदम तामाङ रहनेछन् । अहिलेसम्म यो फिल्मका लागी पल शाह मात्रै फाईनल भएका छन् भने अन्य कलाकारहरु छनौटको क्रममा रहेको छ । फिल्ममा ६० प्रतिशत भारत र ४० प्रतिशत नेपालका फिल्मकर्मी आवद्ध हुने बताईएको छ ।