इटहरी/आर्टमान्डूको नयाँ म्युजिकल फिल्म ‘पञ्चमी मेला’ सार्वजनिक भएको छ। गाउँ वा सहरका साँस्कृतिक सौन्दर्यलाई केन्द्रमा राखेर कथा पस्कने आर्टमान्डूले यसपटक म्युजिकल फिल्ममार्फत् पाँचथरको पञ्चमी बजारको कथा भनेको छ ।‘मैले पहिलो पटक दुनियाँ देखेको ठाउँ यही पञ्चमी हो । मेरो जीवनमा पहिलो पटक साथीहरू बनेका यही पञ्चमीका हुन् । पहिलो पटक भिडिओमा फिल्म हेर्न पाएको पञ्चमी बजारमा हो । पहिलो हाट बजार भरेको अनुभव यही पञ्चमीको छ,’ भिडिओ सार्वजनिक गर्दै फेसबुक पोस्टमा निर्देशक नवीन चौहानले सम्झिएका छन् । गीतको एक अन्तरा छ–
पञ्चमी हाटबजार मेलैमा
कर्कले पानी हौ होस् गर बेलैमा
करिब ८ मिनेटको म्युजिकल फिल्ममा पञ्चमी बजारमा पाँचथरका युवक र सिमी बेच्न आएकी इलामकी युवतीको भेट हुन्छ । भेटमा युवतीसँग आकर्षित भएका युवक छोरी माग्न घरसम्म पुग्छन् । दुईबीचको प्रेममार्फत् भिडिओमा बजारको सौन्दर्य र पूर्वको स्वाद पस्किएको छ । ‘तिथिमा लाग्ने यो बजारमा भेट भएका कति युवायुवतीको विवाह भएर घरजम नै भएको छ । बिडम्बना अहिलेयो बजार धेरै उजाडिएको छ,’ नवीन भन्छन् ।
गीतमा गायिका अञ्जु पन्त र गायक भुषण खतिवडाले स्वर दिएका छन् । गीतकार हर्क साउदले शब्द कोरेको गीतमा भुषणकै कम्पोजिसन छ । भिडिओमा मिलन खत्री, चन्दा ढुंगाना, अन्वेश थुलुङ राई, ओम कार्की, नरेन्द्र बस्नेत, केदीप बस्नेत लगायतको अभिनय छ । भिडिओलाई योगेश ढकालले खिचेका छन् ।
भिडिओलाई नवीन र केर कोइँच लिनुचले निर्देशन गरेका छन् । यसअघि आर्टमान्डूका पाहुना हजुर, फूलथुंगे रानी, तीनपाते, घुमीघुमी, चन्द्रमा, के माया लाग्छ र लगायत अधिकांश भिडिओ लोकप्रिय छन् । अहिले आर्टमान्डू फिल्म ‘ऊनको स्वीटर’ निर्माण तयारीमा छ । हेर्नुहोस् भिडियो ।
Discussion about this post