इटहरी/जनकपुरधाम । जनकपुरमा सांस्कृतिक नृत्य झिझिया महोत्सव आयोजना हुने भएको छ । नव मिथिला फाउन्डेसनको आयोजनामा शुक्रबार झिझिया महोत्सव हुने आयोजकले पत्रकार सम्मेलन गरी जानकारी गराएको हो । मिथिलाको लोक संस्कृति, लोक गायन र धार्मिक परम्परालाई पछ्याउँदै झिझिया आयोजना गर्न लागेको फाउन्डेसनका अध्यक्ष अमित कुमारले बताए ।
उनका अनुसार पहिलोपटक पाँच सय जना टाउकोमा घैँटा राखेर झिझियाको गीतमा नाच्ने छन् जसमा केही झिझियाको समूह र जनकपुरका स्कुल क्याम्पसका छात्राहरू एकै लयमा झिझिया नाच्ने छन् । जनकपुरस्थित रेल्वे स्टेसनको प्राङ्गणमा हुने महोत्सवमा सुरुमा वक्ताहरूले लोप हुँदै गइरहेको झिझियाको विगत, वर्तमान र भविष्यबारे चर्चा–परिचर्चा गर्ने फाउन्डेसनका उपाध्यक्ष आदित्य नेपालले बताए ।
उनका अनुसार कार्यक्रममा स्थानीय लोक गायकहरूको समेत सहभागी रहनेछ । फाउन्डेसनले विगत पाँच वर्षदेखि जनकपुर साहित्य महोत्सव आयोजना गर्दै आएको छ । यस वर्षदेखि ‘जनकपुर झिझिया महोत्सव’आयोजन गर्न लागेको हो । ‘झिझिया लोप हुँदै गएको छ । यसको जगेर्ना हाम्रो जिम्मेवारी हो,’ उपाध्यक्ष नेपालले भने, ‘झिझियाको महत्त्व र औचित्य नयाँ पुस्ताले पनि बुझोस् भन्ने ध्येयले अब प्रत्येक वर्ष झिझिया महोत्सव गर्छौँ ।’
Discussion about this post