इटहरी/ छायांकन अगावै टिजर सार्वजनिक गरेर चर्चामा आएको अनमोल केसी प्रमुख भुमिकामा रहने फिल्म ‘फर्की फर्की’को प्रदर्शन मिति घोषणा गरिएको छ । यो फिल्म छायांकनमा पनि निस्किएको छैन् । तर, आउने वर्ष २०८१ सालको गणतन्त्र दिवसको अवसर पारेर यो फिल्म जेष्ठ ११ गते प्रदर्शन गरिने पक्का भएको छ । फिल्मका निर्माता रोहित अधिकारीले आज आइतबार दशैँको पहिलो दिन अर्थात घटस्थापनाको अवसर पारेर प्रदर्शन मिति सार्वजनिक गरेका हुन् ।
उनका अनुसार यतिबेला फिल्मको वर्कसप धमाधम चलिरहेको छ । वर्कसपमा अभिनेता अनमोल केसी लागिपरेका छन् भने अभिनेत्री जसिता गुरुङ केहिदिन पछिबाट वर्कसपमा जोडिने बताइएको छ । यो फिल्ममा अनमोल र जसितासंगै समृद्धि अर्याल र रवि काफ्लेको पनि प्रमुख भुमिकामा अभिनय रहने छ । सुयोग गुरुङले निर्देशन गर्ने तय भएको यो फिल्म आगामी मङ्सिर १ गतेदेखि छायांकनमा जाने र त्यसअघि लक्ष्मीपूजाको दिन शुभमुहूर्त गरिने निर्माता रोहितले जानकारी गराए ।
निर्देशक सुयोगकै कथा तथा पटकथा रहने फिल्मको लगानिकर्ताको रुपमा रोहितसंग ओएसआर डिजिटलका संचालक ॐ अग्रवाल रहने छन् भने मनोज ओली र रामु न्यौपाने सह-निर्माताको रुपमा रहन छन् । यसअघि ‘गाजलु’ र ‘छ माया छपक्कै’ जस्ता हिट फिल्म पस्कीसकेका रोहितको ब्यानर ‘रोहित अधिकारी फिल्म्स’को प्रस्तुतीमा यो फिल्म ‘फर्की फर्की’ निर्माण हुनेछ ।
Discussion about this post