फिल्म ‘परदेशी-२’ को प्रचारप्रसार गर्दै इटहरीमा प्रकाश सपुत र वर्षा सिवाकोटी

इटहरी/ यहि असोज २६ गतेबाट देशव्यापी प्रदर्शनमा आउन लागेको फिल्म ‘परदेशी २’ युनिट प्रचारप्रसार गर्दै पुर्व अर्थात कोशी प्रदेश आइपुगेको छ । टिमले पुर्वको केन्द्रको रुपमा रहेको इटहरीमा पत्रकार भेटघाट गर्दै ‘परदेशी २’ फिल्म हेर्दिन आग्रह गरेको छ । परिकला न्युज डटकमको सभाहलमा आयोजना गरिएको पत्रकार भेटघाटमा फिल्मका तर्फबाट अभिनेता प्रकाश सपूत, अभिनेत्री वर्षा सिवाकोटी र निर्माता राजेस बंसलको उपस्थिति रहेको थियो ।

पत्रकार भेटघाटमा बोल्दै अभिनेत्री वर्षाले ‘मौलिक नेपाली कथामा बनेको फिल्म भएको हुनाले सम्पुर्णले परदेशी २ हेर्न नछुटाउन’ अनुरोध गरिन् । यस्तै अभिनेता प्रकाशले पनि आफ्नो साङ्गीतिक करियर सुरु हुँदै गर्दाखेरी छायांकन भएको फिल्म भएपनी कहिले नमर्ने कथा परदेशी २ मा भएको हुनाले यो फिल्म नेपालिहरुको आफ्नै कथा रहेको सुनाए ।

यता परदेशी २ का निर्माता राजेशले पनि देशव्यापी रुपमा प्रचारप्रसारमा हिड्दै गर्दा फिल्म निर्माणमा चुनौती रहेको र यो चुनौतीलाई सामना गर्दै अगाडि बढ्न हौसला मिलेको बताए । इटहरीमा पत्रकार भेटघाट गर्दै फिल्म युनिटले इलाइट सिनेमा हल भिजिटपछि पुर्वान्चल इन्स्टिच्युट अफ फिल्म एण्ड टेलिभिजनमा अन्तरक्रिया कार्यक्रम गरिएको थियो ।

इटहरीको विभिन्न मिडियामा अन्तर्वार्तापछि फिल्म युनिट धरानमा पत्रकार सम्मेलन तथा हल भिजिटमा गएको थियो । असोज २२ र २३ गतेका लागी पुर्व प्रचारप्रसारका लागी आएको फिल्म युनिटले भोलि अर्थात २३ गते दमक र बिर्तामोडमा पत्रकार भेटघाट कार्यक्रम गर्नेछ । नारायण रायमाझीले निर्देशन गरेको ‘परदेशी २’ फिल्मलाई रायमाझी र राजेस बंसलले संयुक्त निर्माण गरेका हुन् । नारायण इन्टरनेसनलको ब्यानरमा निर्माण भएको फिल्म ‘परदेशी २’मा प्रकाश र वर्षाको अलावा केकि अधिकारी, दिलिप रायमाझी, प्रशान्त तामांग, नीर शाह, रमा थपलिया, सविन बास्तोला, देवेन्द्र बब्लु र रोशनी कार्कीलगायतको अभिनय रहेको छ ।