इटहरी/ नेपाली फिल्म ‘एक भगवत् गीता’ र ‘नाङ्गो गाउँ’ प्रदर्शनको नजिक आइसकेको छ । तर, यता ‘एक भगवत् गीता’ को नाम विवाद भएपछि भने निर्माण युनिटलाई तनाब भएको छ । फिल्म प्रोमोसन गर्न ब्यस्त हुनुपर्ने समयमा आफ्नो फिल्मलाई सेन्सर सिफारिस दिन चलचित्र बिकास बोर्डमा रुँदै हात जोड्न बाध्य भैरहेका छन् निर्माता सुनिल कुमार थापा । तर, नाममाथी विवाद सिर्जना हुँदै गर्दा विवाद गर्नेहरुले फिल्मभने हेरेका छैनन् । बिनाकारण निर्मातालाई बोर्ड अध्यक्ष भुवन केसिले दु:ख दिएको भन्दै धेरै चलचित्रकर्मीहरु ‘एक भगवत् गीता’ युनिटको पक्षमा उभिएका छन् ।
त्यसै पनि चर्चामा रहेको यो फिल्मको नाम विवादले पनि अझै पब्लिसिटीमा साथ त पुगेको छ । तर, नेतृत्वमा रहेकाको कमजोरीका कारण निर्माताले अनावश्यक दु:ख भोग्नुपरेको छ । यता युट्युब हेर्ने हो भने पनि यतिबेला यो फिल्मको ट्रेलर हेर्नेहरुको संख्या उल्लेख्य छ । यो फिल्मको ट्रेलरले युट्युब ट्रेन्डिङको मुभी क्याटोगरीको दोश्रो स्थान कब्जा गरिरहेको छ भने ‘एक भगवत् गीता’लाई ‘नाङ्गो गाउँ’ ले पछ्याई रहेको छ । ट्रेन्डिङको पहिलो नम्बरमा भने हाल प्रदर्शनरत साहरुख खान अभिनित बलिउड फिल्म ‘जवान’को ट्रेलर रहेको छ ।
दोश्रो नम्बरमा रहेको ‘एक भगवत् गीता’लाई ८ दिनको अवधिमा ७ लाख २६ हजार बढी पटक हेरिएको छ भने २ साताअघि सार्वजनिक भएको फिल्म ‘नाङ्गो गाउँ’को ट्रेलरलाई भने १२ लाखभन्दा बढीपटक हेरिएको छ । दुबै फिल्म एकसाथ प्रदर्शन हुँदा ब्यवसायिक धक्का लाग्ने देखिन्छ । सुस्ताएको साउनलाई भदौले उकास्छ भन्ने आश गरिएको थियो । भदौमा यसअघि सार्वजनिक प्रदर्शन भएका फिल्महरुले अपेक्षाकृत व्यापार गर्न सकेन । अब ब्यापारिक रुपमा सम्भावना बोकेको यहि ‘एक भगवत् गीता’ र ‘नाङ्गो गाउँ’ हो । तर, एकसाथ जुध्दा भने त्यो सम्भावना पनि नरहने हो कि भन्ने संका उब्जिएको छ ।
Discussion about this post