नाङ्गो गाउँको ‘सुन सुन सुन्दरी’, दयाहाङ र मिरुना रोमान्टिक

इटहरी/ यहि भदौको अन्तिम अर्थात २९ गतेबाट सार्वजनिक प्रदर्शनमा आउने फिल्म ‘नाङ्गो गाउँ’को पहिलो गीत ‘सुन सुन सुन्दरी’ सार्वजनिक भएको छ । सार्वजनिक गीतको भिडियोमा अभिनेता दयाहाङ राई र र अभिनेत्री मिरुना मगरलाई रोमान्टिक अवतारमा प्रस्तुत गरिएको छ । दर्शकले संगै हेर्न रुचाउने यो जोडी निर्माता तथा निर्देशकको समेत पहिलो प्राथमिकतामा पर्छन् । आधा दर्जन फिल्महरु यो जोडिको अभिनयमा आउँदै छ ।

दया र मिरुनाको पछिल्लो फिल्म ‘जारी’ सुपरहिट भएपछि यो पटकपनि माया उतिकै पाउने अपेक्षा गरिएको छ । ‘सुन सुन सुन्दरी’ गीत सार्वजनिक भएको छोटो समयमै दर्शकहरुको राम्रो प्रतिक्रिया पाईरहेको छ । नाङ्गो गाउँको निर्माताको रुपमा जया श्रेष्ठ र कार्यकारी निर्माता रामहरि श्रेष्ठ रहेका छन् भने लेखक तथा निर्देशक दिपेन्द्र लामा हुन् । चित्लाङ क्षेत्रमा छायांकन गरिएको यो गीतमा मौलिकता झल्किएको छ । हेर्नुस् भिडियो ।

हिमाल कडरियाको प्रस्तुतिमा तयार भएको यो फिल्मको यो गीतमा रामजी लामिछानेले कोरियोग्राफी गरेका छन् । अन्जु पन्त र एस डि योगीको स्वर रहेको गीतको भिडियोलाई आलोक शुक्लाले छायांकन गरेका छन् । सुशान्त गौतमको संगीत तथा सुष्मा सिग्देलको शब्द यो गीतमा समावेश गरिएको छ । नाङ्गो गाउँमा दयाहाङ राई र मिरुना मगरसंगै शिशिर वाङ्देल, कर्मा, साम्राज्ञी राज्यलक्ष्मी शाह, बुद्दि तामाङ, रविन्द्र झा, विशाल पहारी, राज थापा, कमलमणि नेपाल, अंकित खड्का, पुष्कर गुरुङ लगायतका कलाकारको अभिनय रहेको छ ।