इटहरी/ यतिबेला सामाजिक सञ्जाल टिकटकमा ‘कथाघेरा’का क्लिप र गीतहरू अत्याधिक भाइरल भइरहेका छन् । यही भाइरल क्रेज र रंगमञ्चको बलियो पृष्ठभूमि बोकेकी थिएटर आर्टिस्ट सुस्मिता कुँवरले अब नेपाली फिल्म क्षेत्रमा पाइला टेक्ने पक्का भएको छ । ‘कथाघेरा’ कै चर्चित नाटक ‘बाटैबाटो’ बाट आफ्नो जीवन्त अभिनयको छाप छोड्न सफल सुस्मिताले बहुप्रतीक्षित फिल्म ‘चिरञ्जीवी भवः’ मार्फत नेपाली फिल्म उद्योगमा अभिनेत्रीको रूपमा डेब्यु गर्न लागेकी हुन् ।
सुस्मिता मूलतः रंगमञ्चमा खारिएकी कलाकार हुन् । ‘कथाघेरा’ सँग जोडिएर गरेका काम र सामाजिक सञ्जालमा भाइरल भइरहेका क्लिपहरूकै कारण पछिल्लो समय उनी आम दर्शकमाझ झनै धेरै चिनिएकी छन् । टिकटकमा मात्रै उनलाई पछ्याउनेको संख्या १ लाख १७ हजारभन्दा बढी छ भने फेसबुकमा पनि हजारौं फलोअर्स छन् ।
त्यसो त टेलिभिजन दर्शकका लागि उनी नौलो अनुहार होइनन् । चर्चित नेपाली टेलिफिल्म ‘सक्कीगो नि’मा ‘बले’ की ‘प्यारी’ को भूमिकाबाट उनले धेरैको मन जितेकी छन् । यसका साथै विभिन्न लोक दोहोरी गीतका म्युजिक भिडियोहरूमा समेत उनले मोडलिङ गरिसकेकी छन् । ब्लकबस्टर फिल्म ‘परान’ का निर्देशक दीपकप्रसाद आचार्य ‘काकु’ ले निर्देशन गर्न लागेको यस फिल्ममा सुस्मिता अनुबन्ध भएसँगै कास्टिङ लाइनअप निकै रोचक बनेको छ ।
@parikalanewsofficial
यो फिल्ममा यसअघि नै अभिनेता आशीर्वाद क्षेत्री र अभिनेत्री प्रसंशा रायमाझी अनुबन्धित भइसकेका छन् । नयाँ वर्ष २०८३ को अवसर पारेर गत वैशाख १ गते निर्माण घोषणा गरिएको यस फिल्मको कथा कुमार कट्टेल ‘जिग्री ब्रो’ ले तयार पारेका हुन् । फिल्मको पटकथा तथा संवाद लेखनमा सविन अधिकारी र वसन्त न्यौपानेले काम गरिरहेका छन् ।
फिल्मका निर्माता उमेश कुमार बराल हुन् भने कार्यकारी निर्माताको जिम्मेवारी कुमार कट्टेल र शैलेश खत्रीले सम्हालेका छन् । निर्माण पक्षले दिएको जानकारी अनुसार फिल्मको प्रि-प्रोडक्सनको काम लगभग अन्तिम चरणमा पुगिसकेको छ । यतिबेला स्क्रिप्टको अन्तिम ड्राफ्टलाई माझ्ने काम धमाधम भइरहेको छ । सम्पूर्ण तयारी पूरा गरेर अबको करिब एक महिनामा फिल्म फ्लोरमा जानेछ । फिल्मको केही प्रतिशत छायाङ्कन कोशी प्रदेशका विभिन्न रमणीय स्थानहरूमा पनि गरिने बताइएको छ ।
Discussion about this post