फिल्म ‘हर्ष’को पारिवारिक जमघट समेटिएको गीत ‘सिठ्ठी मार’ सार्वजनीक

इटहरी/ निर्देशक एकता पौडेलको डेब्यू फिल्म ‘हर्ष’ ले आफ्नो पहिलो गीत ‘सिठ्ठी मार’ सार्वजनिक गरेको छ । आउँदो मंसिर १२ गते रिलिज हुने पारिवारिक ड्रामा फिल्मले लामो समयपछि नेपाली फिल्ममा पारिवारिक जमघटलाई केन्द्रमा राखेर नाचगान गर्न मिल्ने धमाकेदार गीत ल्याएको दाबी गरेको छ ।

सार्वजनिक गीत ‘सिठ्ठी मार’ प्रताप दास र सदिक्षा कट्टेलको युगल स्वरमा सजिएको छ, जसमा एलिस कार्कीको संगीत र पवित्रा घिमिरेको शब्द रचना रहेको छ । सुनिल क्षेत्रीले कोरियोग्राफी गरेको यो गीतलाई आलोक शुक्लाले खिचेका छन् । गीतमा फिल्मका प्रायः सबै कलाकारहरू फिचर्ड छन् ।

वर्षा राउत, खगेन्द्र लामिछाने, सन्तोष पन्त, विशाल पहारी, शर्मिला मल्ल, अंशु महर्जन, सुनिल क्षेत्री, माओत्से गुरुङ, लुनिभा तुलाधर लगायतका कलाकारहरूको अभिनय रहेको भिडियोमा पारिवारिक जमघटको माहोल छ । निर्माण पक्षले यो गीतलाई नेपालीहरूको हरेक खुशीका जमघटको प्रिय गीत र सकारात्मक ऊर्जा भर्ने किसिमले बनेको विश्वास लिएको छ । हेर्नुस् भिडियो ।

भिडियोमा सबै कलाकारहरूलाई सटिक तरिकाले प्रयोग गरी ‘फ्युजन नृत्य’ को मज्जाको माहोल सिर्जना गरिएको छ, जसले गर्दा परिवारका सबै सदस्य आमा, बुबा, काका, काकी, दाजु, दिदी, भाई, दिदीबहिनी एकसाथ नाच्न सक्नेछन् ।
स्व. शिव रेग्मीको विरासतलाई निरन्तरता दिँदै एकता पौडेल
अष्टलक्ष्मी प्रोडक्सन्स् र ई-प्राईम मुभिजको ब्यानरमा प्रशन्न पौडेल तथा विकाश पौडेलले निर्माण गरेको यस फिल्ममा हिक्मत चोखाल कार्यकारी निर्माताको रुपमा रहेका छन् ।

दिवंगत निर्देशक शिव रेग्मी की भाञ्जीसमेत रहेकी निर्देशक एकता पौडेलले न्यूयोर्क सिनेमा एकेडेमीमा फिल्म मेकिङ अध्ययन गरेकी छन् र यसअघि केही छोटा फिल्महरू समेत निर्माण गरिसकेकी छन् । उनले ‘हर्ष’ मार्फत स्व. रेग्मीको विरासतलाई सशक्त निरन्तरता दिने अपेक्षा गरिएको छ । फिल्मको कथा स्वयं निर्देशक पौडेलले लेखेकी हुन् । उनले आफू र आफ्नो टिमले दर्शकलाई ‘हर्ष’ उत्कृष्ट रुपमा पस्किने बताउँदै आएकी छन् ।

@parikalanewsofficial

फिल्ममा खगेन्द्र लामिछाने, वर्षा राउत, सन्तोष पन्त, शर्मिला पन्त, माओत्से गुरुङ, विशाल पहारी, लुनिभा तुलाधर, अंशु महर्जन लगायत बाल कलाकार साइमन वादीको अभिनय रहेको छ । ‘हर्ष’मा समीर र हिमाल, वसन्त सापकोटा तथा एलिश कार्की को संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलको कोरियोग्राफी रहेको छ ।

यसमा स्वर्गीय शिव रेग्मी, डाक्टर कृष्णहरी बराल, पवित्रा घिमिरे, नीरकमल खड्का को शब्द रचना प्रयोग गरिएको छ ।
सम्पूर्ण छायांकन चितवन मा गरिएको फिल्म हाल पोष्ट प्रोडक्सनको चरणमा छ । गोविन्द शाहीको काफिया फिल्मस् ले वितरण गर्ने यस फिल्मको डिजिटल राइट्स बुढासुब्बा डिजिटलले किनेको छ ।