प्रदर्शनरत फिल्म ‘बगान’लाई काठमाडौ महानगरको ५० हजार जरिवाना

इटहरी/ अभिनेता सरोज खनाल डेब्यु निर्देशन रहेको फिल्म ‘बगान’ यतिबेला देशव्यापी प्रदर्शनमा छ । तर, व्यापार सुखद छैन । यहि तनाव निर्माताले झेल्नु परिरहेको अवस्थामा काठमाडौ महानगरपालिकाले फिल्म ‘बगान’ युनिटलाई ५० हजार जरिवाना तिराएको छ । फिल्मको पोस्टर टासी दृश्य प्रदुषण गरेको भन्दै उक्त जरिवाना तिराएको हो । फिल्मका निर्माता सुरेश वाग्लेले फेसबुकमा जरिवाना तिरेको रसिद सहितको एक पोस्ट गर्दै सो कुराको जानकारी गराएका हुन् ।

उनले स्ट्याटसमा मेयर बालेन शाहको फेसबुक पेज मेन्सन गर्दै ‘आदिपुरूष हिन्दी सिनेमालाई त रोक्नु भयो, नेपाली सिनेमालाई सहयोग पनि गरिदिनुहोला’ भनेर आग्रह गरेका छन् । यस्तै ‘हाम्रो जानकारीविना हाम्रो डिस्टिब्युटरले आफ्नो घरको भित्तामा टालेको पोस्टरलाई महानगरले ५० हजार जरीवाना तिराएछ । महानगर प्रहरी प्रमुख राजु पाण्डेजीले मिडियावाजी गर्नुअघि हामीलाई जानकारी गराउनु भएको भए हामी त्रुटि सच्याउने समय पाउँथ्यौँ ।’ भन्दै आफुलाई पुर्व जानकारी नगराईएकोमा दुखेसो पोखेका छन् ।

निर्देशक वाग्लेले ‘वातावरण प्रदूषण विरूद्धको महानगरको अभियानमा हाम्रो साथ र सहयोग सदैव रहने छ ।’ भन्दै बालेनको अभियानलाई समर्थन समेत गरेका छन् । काठमाडौ महानगरले गत चैत्रदेखी महानगरको सार्वजनिक स्थानमा बिज्ञापनको नाममा कुनैपनी पर्चा, पम्प्लेटहरु टास्न बन्देज गरेको थियो । एकल महिलाको कथा बोल्ने फिल्म बगानमा करिष्मा मानन्धर, निर्देशक सरोज खनाल, आकाश श्रेष्ठ, प्रमिला कार्की, नीर शाह, बसुन्धरा भुषाल, मिथिला शर्मा लगायतको अभिनय रहेको छ ।