इटहरी/ कोशी प्रदेशमा छरिएर रहेका चलचित्रकर्मीहरुलाई समेटेर स्थापना भएको नेपाल चलचित्रकर्मी महासंघ कोशी प्रदेशले ‘चलचित्रकर्मी राहत कोष’को स्थापना गरेको छ । गएको असार ३१ गते बसेको महासंघको बैठकले मोडल तथा अभिनेत्री मेनुका माझीको संयोजकत्वमा उक्त राहत कोषको स्थापना गरिएको महासंघका अध्यक्ष अरुण कुमार प्रधानले जानकारी गराए । कोषको सदस्यहरुमा पुर्वान्चल इन्स्टिच्युट अफ फिल्म एन्ड टेलिभिजनका संचालक रोनिश राउत र मोडल तथा अभिनेता माधव केसिसहित ३ सदस्यीय समिती गठन गरिएको हो ।
कोषमा आर्थिक वृद्धिका लागी महासंघ कार्यसमिति भित्रबाट प्रत्येक महिना प्रती सदस्य थोरैमा २ सय रुपैयाँ संकलन गर्ने र सो रकम भन्दा माथी स्वेच्छिक सहयोग गर्न सकिने बताइएको छ । अन्य देश तथा विदेशमा रहेका चलचित्रकर्मी तथा सहयोगीदाताहरुलाई समेत कोषमा आर्थिक सहयोगको लागी आव्हान गरिने कोषका संयोजक मेनुका माझीले बताईन् ।
‘चलचित्रकर्मी राहत कोष’ बाट कोशी प्रदेशका चलचित्रकर्मीहरुले लाभ उठाउन सक्नेछन् । नेपाल चलचित्रकर्मी महासंघ कोशी प्रदेशमै केन्द्रित रहेर काम गरिरहेको हुनाले यो राहत कोषले यहि बसेर वा देशको जुनसुकै ठाउमा बसेर चलचित्रकर्म गरिरहेको भएपनी आर्थिक सहयोग गर्न सकिने बताईएको छ । आर्थिक अभावले अप्ठ्यारो अवस्थामा पुगेका, बिरामी परेका वा केही कारणले आर्थिक झमेलामा परेका यहाँका चलचित्रकर्मीहरुलाई महासंघले यो राहत कोषबाट अवस्थाको मुल्यांकन गरेर आर्थिक सहयोग गर्नेछ ।
यस्तो अप्ठ्यारोमा परेका चलचित्रकर्मीको बारे जानकारी आउनसाथ महासंघ तथा ‘राहत कोष’ समितीको भौतीक वा सम्भावना नभए पनि भर्चुअल माध्यमबाट छलफल गरेर तुरुन्तै आर्थिक सहयोग प्रदान गरिने संयोजक माझीको भनाई छ । महासंघ अध्यक्ष प्रधानका अनुसार उनले निर्माण तथा निर्देशन गरेको फिल्म ‘१२ नेपाली १ चिहान’को च्यारिटी शोबाट उठेको रकमको खर्च कटाएर बाकी रहेको रकमको १० प्रतिशत ‘चलचित्रकर्मी राहत कोष’को लागी छुट्याइने छ । उक्त फिल्मको यहि श्रावण २० गते शनिबार म्याजिक सिनेमा झुम्का र श्रावण २५ गते बिहिवार ईलाइट सिनेमा इटहरीमा च्यारिटी शो गरिदैछ ।
Discussion about this post