आफै आलोचित भैरहेको बेला आँचल शर्माले यसकारण दिइन् साइबर ब्युरोमा उजुरी

इटहरी/ आफू विरुद्ध भ्रामक कुराहरु सामाजिक संजालमा फैल्याउने २ फेसबुक पेज विरुद्ध अभिनेत्री आँचल शर्माले साइबर ब्युरोमा उजुरी दिएकी छन् । ‘दयाहाङ राईलाई त्यस्ले मात्र मन पराउँछ जो अशिक्षित र मूर्ख छ’ भन्दै आँचलले अन्तर्वार्ता दिएको भनेर गलत सुचना प्रवाह गरिएको थियो । यस्ता भ्रामक सुचना फैल्याउने ‘एन ईबी रिजल्ट एण्ड अपडेट’ (NEB Result & Update) र ‘रुटिन अफ रन्डी रोना’ (Routine Of Randi Rona) नाम गरेका दुई फेसबुक पेज विरुद्ध शनिबार बेलुका मानहानीको मुद्दा दर्ता गरेकी हुन् । यो कुरा गलत रहेको भन्दै अभिनेता दयाहाङ राईले पनि सामाजिक संजालमा एक पोस्ट गरेका छन् ।

उनले उक्त पोस्टप्रती आफ्नो गम्भीर ध्यानाकर्षण भएको भन्दै ‘अभिनेत्री आँचल शर्माले ‘दयाहाङ राईलाई त्यस्ले मात्र मन पराउँछ जो अशिक्षित र मूर्ख छ’ भन्दै अन्तर्वार्ता दिएको भन्दै सामाजिक सञ्जालमा राखिएको पोस्टमा मेरो गम्भीर ध्यानाकर्षण भएको छ । आँचलले अहिलेसम्म मेरो बारेमा कतै पनि त्यस्तो बोलेको मैले सुनेको छैन । एउटा कलाकारले गर्दै नगरेको कुरा गर्यो भन्नु र बुझ्दै नबुझी गाली गर्नु दुवै चेतनशील मान्छेले गर्ने कर्म होइनन् । त्यसैले सत्य तथ्य नबुझी आँचल वा जोसुकै कलाकारलाई पनि गाली गलौज नगर्न र त्यस्ता भ्रमपूर्ण सामाग्रीहरू प्रसार नगर्नु हुन सबैमा आग्रह गर्दछु ।’ भनेर लेखेका छन् ।

यस्तै उजुरी पश्चात् अभिनेत्री आँचल शर्माले पनि एक पोस्ट गरेकी छन् । दयाले पोस्ट गरेको स्ट्याटसलाई शेयर गर्दै उनले ‘गर्दै नगरेको र भन्दै नभनेको कुरालाई लिएर विगत दुई तीनदेखि मैले सामाजिक सञ्जालमा अनेक गाली खाइरहेको छु । यस्ता कुरामा धेरै रियाक्ट नगरुँ भन्दा भन्दै पनि अब चाहिँ म सहनै नसक्ने भएको छु । जजसले जसको उक्साहटमा यो सब गरिरहनु भएको छ, तपाईँहरुको समय सकियो । म कानुनी कारबाहीको बाटोमा जान बाध्य भएकी छु । मलाई यातना दिएर सामाजिक सञ्जालमा मेन्टल हेल्थको भाषण दिन कृपया बन्द गर्नुस् ।’ भनेर लेखेकी छन् ।

आँचल आफै पनि यतिबेला आलोचनाको झमेलामा परिरहेकी छन् । एक फेसन कार्यक्रमको अडिसन निर्णायकिय भुमिकामा रहेर ‘बडी सेमिङ’ गरेको भन्दै उनीमाथि सामाजिक संजाल प्रयोगकर्ताहरु खनिएका छन् । आँचलले ‘उसले केही खाँदैन कि क्या हो’ भन्दा छेउकै एक पुरुषले ‘मेन्टेन’ गरेको होला भन्ने जवाफ दिएका छन् । आँचलले यसलाई मेन्टेन गरेको भनिंदैन कुपोषण भएको भनिन्छ भनेर जवाफ फर्काएकी छन् । जुन कुराहरु बोलेको भिडियो यतिबेला सामाजिक संजालमा भाईरल भैरहेको छ ।