'यो मन त मेरो नेपाली हो’ को टिजर सार्वजनिक

इटहरी/ आगामी असार २७ गते प्रदर्शनमा आउन लागेको फिल्म ‘यो मन त मेरो नेपाली हो’ को टिजर सार्वजनिक भएको छ। यसले नेपाली भाषा, साहित्य, कला, इतिहास र यसको गहन महत्वलाई उजागर गर्दै ‘नेपाली को हुन्?’ भन्ने मौलिक प्रश्नमा केन्द्रित रहेर नेपाली पहिचानको गौरवलाई सशक्त रूपमा प्रस्तुत गर्न खोजेको छ।

फिल्ममा रोशन श्रेष्ठ, विजय बराल, विल्सन विक्रम राई, बुद्धि तामाङ ‘हैट’, आयुषा समाल, नारायण खाती, भुपेन्द्र लिङ्देन ‘मन्त्री’, सुबास भन्डारी, विजय सुब्बा, बिजिता परियार, देवराज राजबन्शी, भानुभक्त सिटौला लगायतका कलाकारहरूको अभिनय रहेको छ।पद्मा ईश्वर इन्टरटेन्मेन्ट प्रालिको प्रस्तुतिमा निर्माण भएको यो फिल्ममा मित्र प्रधान प्रस्तुतकर्ताका रूपमा रहेका छन् भने ज्ञान बहादुर प्रधान, रोशन ले निर्माणको जिम्मेवारी सम्हालेका छन्। अमेरिकामा रहेका साहित्यकार मित्र प्रधान,नर ले निर्देशन गरेको यस फिल्मको लेखन शिवम् अधिकारी ले गरेका हुन्।

प्राविधिक पक्षमा सौरभ लामा को छायांकन, देव महर्जनको द्वन्द्व निर्देशन, समिर मिया को भिए फ एक्स, कविराज गहतराज र प्रमोद भण्डारी को कोरियोग्राफी, बनिश शाह को सम्पादन तथा सत्यम राना को सीजीआई रहेको छ।फिल्ममा दीपक शर्मा, विकास चौधरी र थोरम्पो ह्यङ राई को संगीत रहेको छ। गीतहरूमा दीपक शर्मा, विल्सन विक्रम राई, र शंकर अधिकारी ‘घायल’ को शब्द रहेको छ भने खैजडी गीतमा अनिश अधिकारी ले शब्द संकलन गरेका छन्।

‘यो मन त मेरो नेपाली हो’ को छायांकन नेपालको झापा, इलाम सँगै भारतको सिकिम, दार्जीलिङ, जयगाउँ पश्चिम बंगाल र अमेरिका लगायतका विभिन्न स्थानमा गरिएको छ। यसले फिल्मको वृहत् क्यानभासलाई झल्काउँछ। यसका साथै, फिल्ममा भारत, मलेसिया, पोल्याण्ड, अस्ट्रिया, बेल्जियम, साउथ अफ्रिका र अमेरिकी कलाकारहरूको समेत अभिनय रहेको छ।