फिल्म ‘ह्रस्व दीर्घ’को गीत सार्वजनिक, गायक दुर्गेश थापा सुध्रिएको प्रमाण

इटहरी/ बलिउड दिग्गज कलाकारहरू राखेर फिल्म बन्ने चर्चा चलेदेखी प्रतिक्षित बनिरहेको फिल्म ‘ह्रस्व दीर्घ’को पहिलो गीत सार्वजनिक गरिएको छ । आगामी असोज ३ गते अर्थात संविधान दिवसको अवसर पारेर सार्वजनिक हुने फिल्म ‘ह्रस्व दीर्घ’को ‘उठेर नाचिस्यो, बसेर नाचिस्यो’ बोलको गीत तथा भिडियो सार्वजनिक गरिएको हो । शुक्रबार नाग पञ्चमीको अवसर पारेर सार्वजनिक भएको सो गीतमा फिल्मका मुख्य कलाकार नीता ढुंगाना र हरिहर अधिकारी फिचर्ड छन् ।

उक्त गीतमा दुर्गेश थापाको शब्द रचनासंगै संगीत, एरेन्ज र स्वर समेत समावेश गरिएको छ । दुर्गेशको यो कामको तारिफ समेत भैरहेको छ । उनले केहिअघि एक कार्यक्रममा आफू सुध्रिएको बताएका थिए । जसको प्रमाण यहि गीत नै हो । यो गीत गायनमा दुर्गेशलाई सदिक्षा कट्टेलले साथ दिएकी छन् । पाश्र्व गायनमा उनको यो डेव्यु फिल्म हो । हेर्नुस् गीतको भिडियो ।

नीता फिल्मस्को प्रस्तुतीमा निर्माण भएको फिल्मको उक्त सार्वजनिक गीतको अडियोसंगै भिडियो पनि उत्कृष्ट बनेको देखिन्छ । अभिनेत्री निताको नृत्य हेर्न लायक छ । कृष्णलाई फकाउदै उनको ठुम्काले अहिले फिल्मी बजारमा चर्चा बटुल्दै गैरहेको छ । यता हरिहरको पार्ट पनि तारिफयोग्य नै छ । उनी पनि यो गीतको भिडियोमा छमछमी नाचेका छन् । सुष्मा सुनामको कोरियोग्राफी रहेको यो गीतले फिल्मको हाईपलाई अझै उठाएको बुझ्न सकिन्छ ।

यो फिल्म ‘ह्रस्व दीर्घ’को कार्यकारी निर्माता धनन्जय गलानी हुन् भने फिल्ममा हरिहर अधिकारी र नीता ढुंगानाको अलावा ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसी लगायतका कलाकारको अभिनय रहेको छ । यो फिल्ममा अभिनेत्री निता ढुंगानाको लगानी रहेको छ भने चन्द्र पन्तले निर्देशन गरेका छन् ।

पन्तले यहि फिल्मबाट नेपाली फिल्ममा निर्देशकको रुपमा डेब्यु गर्दै छन् । यसअघि उनले भोजपुरी फिल्मको निर्देशन तथा करिब पाँच दर्जनबढि नेपाली फिल्ममा द्धन्द्व निर्देशकको रुपमा काम गरिसकेका छन् । फिल्ममा अभिनेता हरिहर अधिकारीको कथा समावेश छ । यसको पटकथा तथा संवाद भने प्रतिक पौडेल, निर्देशक पन्त र हरिहरले संयुक्त रुपमा तयार गरेका हुन् । नेपालीसंगै तेलुगु र हिंन्दी गरी तीन भाषामा रिलिज गरिने फिल्म ‘ह्रस्व दीर्घ’लाई बलिउडका चर्चित सिनेमाटोग्राफर कवीरलालले खिचेका हुन् ।