अभिनेता प्रदिप खड्काको जन्मदिनमा ‘दमाहा’ बजाउदै गरेको तस्वीर सार्वजनिक

इटहरी/ अभिनेता प्रदिप खड्काको जन्मदिनको शुभ अवसर पारेर फिल्म ‘पुजार सार्की’ निर्माण युनिटले उनको क्यारेक्टर लुक्स सार्वजनिक गरेको छ । निर्देशक दिनेश राउतले उनले नाम ‘मैत बहादुर’ रहेको जनाउँदै पात्र परिचय दिने दुई वटा तस्वीर सार्वजनिक गरेका छन् । सार्वजनिक तस्वीरमा खड्का लामो कपाल पालेका, कालो टोपी पछाडि ढल्काएर लगाएका र पञ्चेबाजामा प्रयोग हुने प्रमुख बाजा ‘दमाहा’ बजाउँदै गरेको देखिएका छन् । तस्वीरले उनी पन्छेबाजा बजाउने पात्रको रूपमा परिचय दिएको छ ।

निर्देशक राउतले यो फिल्मलाई जातीय विभेद विरुद्ध समाजका तीन पात्रहरूले गर्ने साझा सङ्घर्षको कथा रहेको बताएका छन् । तर, निर्देशकले मैत बहादुरको थर भने खुलाएका छैनन् । यसको अर्थ प्रदीपले निभाएको चरित्र पहिचानको सङ्घर्षमा रहेको हुनसक्ने अनुमान भने गर्न सकिन्छ । चलचित्र ‘पुजार सार्की’को हाल कास्की जिल्लामा छायाङ्कन भइरहेको छ ।

यो फिल्मलाई विकास सुवेदीले लेखेका छन् । यसअघि विकास र दिनेशले चलचित्र ‘प्रकाश’मा सहकार्य गरेका थिए ।
चलचित्रलाई सङ्गीतकार सुवास भुसालले निर्माण गर्दैछन् । एक दर्जन चलचित्रमा सङ्गीत दिएका भुसालले पहिलो पटक चलचित्र निर्माण गर्न लागेका हुन् । भुसालले सङ्गीत गरेको सुपर हिट गीत ‘लै लै’ र ‘बनकी चरी’ दिनेशले निर्देशन गरेको चलचित्र ‘प्रसाद’मा समावेश थियो भने अर्को सुपर हिट गीत ‘जिन्दगीको के छ र भर’ दिनेशकै चलचित्र ‘सेल्फी किङ्ग’मा समावेश थियो ।

चलचित्र ‘पुजार सार्की’ मा अभिनेत्री द्वय अन्जना बराइली र परीक्षा लिम्बुको पनि प्रमुख भूमिकामा अभिनय रहने छ । बराइलीले यसअघि चलचित्र ‘महापुरुष’मा अभिनय गरेकी थिइन् । परिक्षाले ‘जारी’ र ‘छक्का पन्जा ४’मा अभिनय गरेकी छन् । यस्तै आर्यन सिग्देल र पल शाहको पनि प्रमुख भुमिका रहने पुजार सार्कीमा मोहन निरौला, लोकेन्द्र लेखक, सुवास गजुरेल, विद्या कार्की, तारा शर्मा, शङ्कर आचार्य, प्रेम सुब्बा, गोविन्द रमण पराजुली, राजेश बिसुराल लगायतको पनि अभिनय रहनेछ ।

दर्शकको रोजाइका तीन स्टारहरू एकसाथ चलचित्रमा आउन लागेको खबर बाहिरिएदेखि नै ‘पुजार सार्की’को चर्चा चुलिदै आएको छ । यो चलचित्रले दर्शकमा छोड्ने छाप पनि स्मरणीय हुने आशा गरिएको छ । ‘प्रसाद’, ‘क्लासिक’, ‘नोभेम्बर रेन’, ‘प्रकाश’ लगायतका सफल चलचित्रका निर्देशक राउतले हालसम्म दर्शकलाई निराश बनाएका छैनन् । उनी चलचित्रलाई विषयगत र व्यापारिक दुवै दृष्टिकोणबाट ब्लकबस्टर बनाउन लागिरहेका छन् । मल्टिस्टारर फिल्म ‘पुजार सार्की’को इन्टरनेसनल राइट्स बिक्री भइसकेको छ । फिल्मको फस्टलुक पोस्टर सार्वजनिक भएलगत्तै एमएमएस इन्टरटेन्मेन्टले इन्टरनेसनले राइट्स खरिद गरेको थियोे ।