अशोक दर्जीले ‘कर्म दिने बाउ’को उपमा दिदाँ टंक बुढाथोकीको गहभरी आँशु

इटहरी/ बाल गायकबाट फिल्मी जगतमा कलाकारको रुपमा डेब्यु गर्न लागेका अशोक दर्जीले हालै प्राइम टेलिभिजनमा पत्रकार ऋषि धमलासँगको अन्तरवार्तामा दिएको जवाफले यतिबेला छोटो समयमा निकै चर्चा बटुलिरहेको छ । उनले संगीतकार टंक बुढाथोकीको साथ र सहयोगलाई लिएर गरिने प्रश्नको मर्मस्पर्शी उत्तर दिएका छन् ।

अशोक दर्जीले भनेका छन्, “टंक बुढाथोकीले तलाई के दियो भन्छन क्या, यसको जवाफ चाहिँ म के दिन सक्छु थाहा छ… एउटा कर्म दिने बाउले एउटा माया दिराख्नुभाछ अनि मेरो जुन परिवार झुपडीमा बस्थे राजमहल जस्तो एउटा घर बनाईदिनुभाछ । अहिले यो अशोक दर्जी थिएन भने यति कुरा मेरो भाईबहिनी पढ्न पाउदैनथे, मेरो बाउआमा राम्रो ठाउँमा बस्न पाउदैनथे ।”

अशोकले टंक बुढाथोकीलाई ‘कर्म दिने बाउ’को उपमा दिँदै उनले दिएको माया, झुपडीबाट ‘राजमहल जस्तो घर’ बनाइदिएको र आफ्ना भाईबहिनीको शिक्षा तथा आमाबुबाको राम्रो जीवनलाई ठूलो देनको रूपमा व्याख्या गरेका छन् । अशोकले यो भन्दै गर्दा छेउमै रहेका टंक बुढाथोकीको गहभरी आशु देखिन्थ्यो ।

अशोकको यो जवाफले धेरै दर्शकको मन छोएको छ र सामाजिक सञ्जालमा उक्त अन्तरबार्ता चर्चाको केन्द्रमा छ । धेरैले अशोक दर्जीको यो स्पष्ट र गहकिलो भनाइको प्रशंसा गर्दै उनको आउँदै गरेको फिल्मलाई साथ र सहयोग गर्न अपिल गरिरहेका छन् । कार्तिक २१ गतेबाट प्रदर्शनको तयारीमा रहेको अशोक दर्जी अभिनित फिल्म ‘मन बिनाको धन’ उनको ‘जिरोदेखि हिरोसम्म’को संघर्षपूर्ण कथामा आधारित छ । जसको आज ट्रेलर सार्वजनिक हुँदैछ ।

@parikalanewsofficial

फिल्ममा टंक वुढाथोकीको लेखन तथा निर्देशन रहेको छ । सामाजिक विषयवस्तुमा आधारित यो फिल्मको पटकथा र संवाद भने शिवम अधिकारीले तयार पारेका छन् । फिल्मकी निर्माता विष्णु माया मैनाली हुन् भने सपना शर्मा कार्यकारी निर्माताका रूपमा रहेका छन् । त्यसैगरी जी.पी. संग्रोला, बिबेक नेपाल र बिजया पाण्डे सह-निर्माताको रूपमा छन् ।

‘मन बिनाको धन’ नामसँग जोडिएको कारणले दर्शकमाझ रुचाइएका अशोक दर्जीले यही गीत ‘मन बिनाको धन ठुलो कि धन बिनाको मन’ बाट आफ्नो सांगीतिक यात्रा सुरु गरेका थिए । टंक बुढाथोकीकै संगीत रहेको यो गीतले दर्जीलाई देशव्यापी पहिचान दिलाएको थियो । हाल उनी टंककै घरमा बसेर काठमाडौंमा कक्षा ९ मा अध्ययनरत छन् ।

फिल्ममा अशोक दर्जीका साथै सरोज खनाल, सन्तोष पन्त, रमा थपलिया, नीता ढुंगाना, भोला सापकोटा, बुद्दि तामाङ, रमेश विश्वकर्मा, रवीन्द्र झा, पार्वती अधिकारी, उत्सव सापकोटा, साम्राज्ञी थापा, विनय अधिकारीलगायत धेरै कलाकारले अभिनय गरेका छन् । फिल्मको छायांकन सौरभ लामाले, कोरियोग्राफी कविराज गहतराज र रामजी लामिछानेले, सम्पादन मित्र डी. गुरुङले र मुख्य सहायक निर्देशन नवराज शर्माले गरेका छन् । फिल्मको वितरण एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले संयुक्त रूपमा गर्नेछन् ।